Psa 13 | TUCT | STEP | Mbouŋ to David Oyai Yoova, pataŋani tiina tane ikis ghau malau wa. Ŋeez o uul ghau? Pale lolom iveegh payau taghon taghon gha ila? Mindai ta uŋgooz naghom payau? Ŋeez o matam ilam payau muul?

aMbo 22:1+

Psalms 13

Suŋuuŋ to tamtamon tau pataŋani ighamu saawe malau

Mbouŋ to David

1 Oyai Yoova, pataŋani tiina tane ikis ghau malau wa.
Ŋeez o uul ghau? Pale lolom iveegh payau taghon taghon gha ila?
Mindai ta uŋgooz naghom payau? Ŋeez o matam ilam payau muul? ^a

2 Saawe isov yau naghamgham ŋgar naol pa pataŋani tsiau,
mboŋ ve mataaz lolog isaghat naghe nataŋ.
Pale koiagŋa tiliiv ghau taghon taghon gha ila?
Ŋeez o ulam uul ghau?
3 Yoova, Maaron tsiau, matam ilam payau, ve ughur taliŋam pa suŋuuŋ tsiau tane.
Uul ghau ve ugham tapirig ivot muul.
Mako pale pataŋani tane itatan ghau gha namaat, ve koiagŋa tipakur tauzi tighe tiliiv ghau.
Isaav ighe yau natap ve nagham saghat, ene pale koiagŋa tighita ve tintinizi.

5 Eemon yau nanumeer ghom. Pasaa, yo lolom isaghav tamtamon tsio ariaaŋ ve uluul zi.
Yau lolog poia kat. Pasaa, yau nawatagh: Yo pale ugham mulin ghau pa pataŋani tsiau tane.

6 Tauvene yau aat nambou mbouŋ ve napait Yoova eeza.
Pasaa, i igham poghani ghau kat.